大叔的爱

ansonlht（阿牧）:

《大叔的愛》終於大結局了️ 記得初初公司考慮緊我接唔接拍哩部劇嘅時候，我淨係想像都覺得係會有一定嘅壓力，因為睇過原劇日版實在有太深刻嘅感受，每一個角色都好獨特又出色，每一個場口都好自然但有趣，每一段關係都好虐心但溫暖。自己一開始係好擔心演繹唔到日版嘅精神，甚至會糟蹋咗日版，令大家失望。但心裏知道哩個係一個好好嘅機會去試練，去测試一下自己繼《男排女將》Bobby一角之後可以做到幾多，所以最後同花姐講「我想拍」。 喺之前嘅IG Live同訪問其實都分享咗好多關於拍劇嘅情況同趣事，所以今次分享多一啲「阿牧」嘅成長吧。 坦白講，對我嚟講嗰兩個幾月嘅拍攝喺精神上係幾疲累幾demanding嘅感覺。好記得第一次由頭到尾睇晒成份劇本之後，第一個感覺係：阿牧最開心時嘅energy level都唔及Carmen姐嘅一半成套劇佔咗三分二嘅場口都係比較負面嘅情绪，劇本上好多時出現嘅一句演員指引就係「阿牧不是味兒反應」。拍攝頭幾日我都仲摸索緊「不是味兒」哩個指引係一個咩情緒；但隨著拍攝日子愈來愈長，我就開始明白阿牧嘅不是味兒喺每一場都可能有少少分別，可能係失望？失落？妒忌？心煩？寂寞？ 哩兩三個月，我自己有種感覺覺得「Anson Lo」喺哩個世界彷彿消失咗咁。好多時拍攝完返到屋企係好攰，但會有個意識叫自己執下嘢、做下家務。有時搭車返劇組開工嘅車程途中，聽住「阿牧歌單」，望住車窗出面嘅天空都係灰灰暗暗。可能係絕大部份嘅場口情緒，令自己好似被好多重寂寞嘅氣圍包圍住。 最近好多親戚朋友問我「你喺大叔的愛每次唔開心或者喊嘅時候係諗緊咩？」當時因為有好多場口都係跳拍，全部都唔係跟劇本正常 timeline拍，即使拍緊「分手」嗰一場，其實係仲未拍過任何阿牧同阿田sweet、拍拖嘅場口，所以好多時自己只能靠幻想。「分手」嗰一場拍攝之前，我同呂爵安喺間熄晒燈嘅房入面醞釀情緒。當時我不斷幻想嘅係，阿牧同阿田未發生過嘅拍拖日常畫面、阿田同梓芊一齊咗嘅畫面、阿牧提出分手之後入房執行李離開嘅畫面。或者未必係一個好正確嘅方法，但係我當時唯一依賴嘅做法。 好感謝每一位觀眾支持大叔的愛，支持阿牧哩一個角色。哩三個星期收到好多大家嘅留言，見到大家都好代入每一位角色去分析劇情，你哋會跟住我哋笑、跟住我哋喊。哩三個星期就好似每晚都同大家一齊睇電視咁，大家唔單止會聽主題曲同片尾曲，仲會同阿牧一齊聽阿牧嘅歌單，一齊去感受阿牧嘅內心世界，好感恩可以同你地每一位有一個咁大嘅bonding。 感謝ViuTV令到港版嘅大叔的愛誕生。多謝監製Tommy同導演CK對我嘅信任，兩位由頭到尾都好相信好鼓勵我。好記得拍攝中段我成日問兩位我有啲咩要調整，佢地異口同聲答我：「如果你做得唔好我地一定會同你講，但首先你要俾多啲信心自己，唔好下下覺得自己一定會做得唔好。」你地嘅鼓勵係俾咗好大嘅勇氣我。感激製作組、拍攝組同埋台前幕後所有工作人員成就哩一套劇，冇你地每一位嘅汗水都唔會有依家大家睇到嘅每一個場景、畫面。辛苦晒大家 今次同到自己嘅戰友同埋各位前輩合作，好似多咗一個大家庭咁，好懷念大家一齊有講有笑開工，係好有爱嘅一個工作crew️ 多謝「阿牧」教咗我好多嘢。好早前我講過「每個人都需要一個阿牧」，因為佢令我明白日常生活上待人處事可以再多啲企喺人哋角度諗、多啲照顧身邊嘅人、佢對愛情嘅執著，同埋提醒我係時候要認真學下煮嘢食 感激大家對我嘅包容，演戲上有太多地方要學習同努力。希望大家感受到港版大叔的愛嘅認真同埋背後意義，感受到每一個角色嘅投入。 Anson Lo會繼續努力，因為我知道我真係好享受演戲！希望下一次再畀大家睇到Anson Lo唔同嘅一面 #大叔的愛 #感恩 #辛苦大家睇千字文 edanlui（阿田）:

關於<大叔的愛>這回事(20：30開始打)。 好啦事隔3個月，田一雄終於嚟找數啦 點解隔咗咁耐先講感想？ 其實我都唔想‍️ 我試過開咗個頭，但發覺完全唔知點樣入手（可能因為DSE中文作文拎3)，頓時明白哩單野一定十分time consuming, 所以就決定先將哩篇文擱置，等得閒啲先打 去到前幾日，我發覺我再唔打，可能下年出街我都未打 所以就逼自己襯今日夜晚得閒（平時拎咗嚟打機haha)，一定要爆發小宇宙，完成哩個壮舉 果然我冇估错，由於爵安好多口水廢話再加選擇困難症，呢壇嘢真係需要好多時間。 我淨係揀相都揀咗半個鐘，20:00揀到20:30，20:30開始打，而家20:54，我先打到哩到，都仲未入正題希望真係完成到 (Btw我係咪第一個會講自己幾點打到邊嘅人)。 好，入正題️ 首先一定要多謝<大叔的愛>哩套劇嘅所有幕後工作人員，感激大家嘅用心同付出先成就到哩一套劇集。 每日拍攝嘅氣氛都真係好開心，大家有講有笑，超好玩 同埋大家可能唔知，哩次負責拍攝嘅crew其實大部分都係<男排女將>嘅crew, 甚至有幾位係由我第一套劇<娛樂風雲>睇到我拍<大叔>，所以嗰種感覺係份外親切，好溫馨 亦當然要多謝監製tommy同導演ck,多謝你哋咁夠薑用我同ansonlo做主角 casting嗰陣仲係2020年嘅3月，當時嘅我哋連<男排>都未拍完，咁新咁冇經驗都肯用我哋，真係好大膽真係我係你都驚 多謝你哋嘅信任！(21:11)。 當然都要多謝所有演員們！同大家做戲真係好好玩笑餐死，好希望可以再同大家合作 特別多謝@kennywong8384同@ansonlht啦~多謝德斌咁照顧我，同我分享好多經驗，教我好多嘢，就好似個爸爸咁，超溫暖 Ansonlo就唔多講啦好慶幸可以同你一齊参演哩套劇，希望未來我哋都可以繼續一齊進步一齊support住大家(21：20)。 然後就要多謝田一雄 全靠哩套劇，哩個角色，先會令大家認識Edan, 更加了解Edan。 所以遇上你，我真係唔知係自己幾生修來的福 當初收到casting通知，我就即刻衝去睇日版。一睇完嘅感覺：嘩，好好睇，好好笑，好想做！因為自己本身就好鍾意喜劇，同時亦發現田一雄有部分地方的確同自己好似（善良，可愛嗰part)，又覺得嗰的浮誇樣好正，所以真係好期待。 而同時當然會有壓力，始終係第一次做主角，再加上日版真係做得好好，大家一定會有比較，好擔心會因為自己做得唔好，ruin咗成套劇。 所以臨出街前真係又緊張又興奮，又想睇吓自己嘅表現，又驚自己做得差。 到真係出咗街後，有好多人睇同話好搞笑係好開心嘅 不過同時自己睇返自己就發現好多位都可以做得好啲，亦都睇到好多唔同嘅comments, 去到後尾甚至唔係好敢睇返自己，就索性唔睇算 但之後諗通咗嘅就係，經驗少就係經驗少，演技未夠好就係未夠好，所以先更加要從哩次演出中汲取經驗同教訓，咁下次先可以做得好啲 每一次嘅拍攝同演出都係一個經驗嘅累積，如果我因為驚做得唔好驚比人話，就永遠都進步唔到。 所以要多謝田一雄，比咗我一個咁難得同寶貴嘅經驗我 相信哩次有幫我加到好多exp!!(21:53) 有好多人問，你比人話[渣田]有冇唔開心啊？咁坦白講，邊有人會唔想自己做嘅角色受歡迎同多人鍾意？ 但其實都係大家睇得好投入先會咁姐，我自己睇都心諗[啊田你做乜_啊]，係抵嬲嘅！ 同埋講真。。。小弟都係跟劇本做姐(kidding la~) 不過我事後都有諗過其實有啲地方係自己可以控制到，可能個語氣唔同少少已經冇咁[渣]，但拍嘅時候自己又察覺唔到，所以都係嗰句，經驗~(22：00) 打吓打吓就兩粒鐘，睇到哩到嘅你比個叻你好似都諗唔到啲咩講了~ 總之就好感激[大叔的愛]令更加多人認識到爵安，亦衷心感激每一位喜歡[大叔的愛]嘅你哋 爵安會繼續喺哩條演員嘅道路上努力，希望之後嘅每一個作品都可以比大家見到進步，比大家睇到更多唔同嘅爵安 最後，其實自己私心好想可以再演多次田一雄，希望未來會有機會啦！ 田一雄，我哋有緣再見！️ (22:15 嘩終於完成壯舉，感動) #大叔的爱 #打caption真係唔係咁易 #如果一個唔小心就意外kill咗app我應該會癲️ #原來打咗成1800字 #其實我最憎就係作文 #不過分享感想就另計啦 #啱哂我呢啲口水佬 #係懶得打姐 #唔proofread了 #打錯話我知 #22:20